छठ पर्व मनाउनका लागि रानीपोखरी उपलब्ध गराउन महानगरपालिकालाई आग्रह

काठमाडौँ - महापर्व छठ समारोह समितिले छठ पर्व मनाउनका लागि यही कार्तिक १३ र १४ गते रानीपोखरी उपलब्ध गराउन काठमाडौं महानगरपालिकालाई पुनः आग्रह गरेको छ। समितिले शनिबार काठमाडौँमा पत्रकार सम्मेलन गरी छठ पर्व मनाउनका लागि रानीपोखरी उपलब्ध गराउन काठमाडौं महानगरपालिकालाई आग्रह गरेको हो।

समितिले गत असोज ७ गते छठ पर्व मनाउनका लागि सो स्थान उपलब्ध गराउन काठमाडौँ महानगरपालिकालाई निवेदन दिएको थियो। त्यसको सुनुवाई नभएपछि आफूहरुले पत्रकार सम्मेलनमार्फत सो स्थान उपलब्ध गराउन काठमाडौँ महानगरपालिकालाई पुनः अनुरोध गर्नु परेको समितिका अध्यक्ष मदन साहले बताएका छन्।

उनले असनलगायतका क्षेत्रमा बस्ने व्रतालुहरुलाई सहज होस् भनेर सो स्थानमा छठ पर्व मनाउनका लागि गरिएको आग्रहलाई काठमाडौँ महानगरपालिकाले बेवास्ता गरेको गुनासो समेत गरेका छन्। अध्यक्ष साहले भने, ‘हामीले छठ मनाउन पाउँ भनेर यो पत्रकार सम्मेलन राखेका हौं। खोली दिए धेरै राम्रो हुन्थ्यो। असनमा बस्नेहरुलाई छठ मनाउन सजिलो हुने भएकाले हामीले महानगरपालिकालाई रानी पोखरी उपलब्ध गराउन फेरी पनि विनम्र अनुरोध गर्दछौं।’

रानीपोखरीमा २०६३ सालदेखि निरन्तर छठ पर्व मनाईदै आएकोमा त्यसको भौतिक पूर्वाधार निर्माण कार्य भएकाले केही समय रोकिएको थियो। तर यस वर्ष भने भौतिक पूर्वाधारको सबै काम सकिएकाले यही कार्तिक १३ र १४ गते विभिन्न कार्यक्रमका साथ रानीपोखरीमा भव्य रुपमा छठ पर्व मनाउने तयारी गरिएको तर काठमाडौँ महानगरपालिकाले भने अझैं सो स्थान उपलब्ध नगराएकोमा पनि मर्माहत भएको समितिका अध्यक्ष साहले बताएका छन्।

तराई-मधेशमा भव्य रुपमा मनाइँदै आएको छठ पर्व विगत केही वर्षयता काठमाडौँ उपत्यकामा पनि भव्य रुपमा मनाउने गरिएको छ। छठ पर्वले पारिवारिक कल्याण, सन्तान सुख तथा मनोकामना पूरा हुने जनविश्वास रही आएको छ।

मौसम

×

विनिमय

×

राशिफल

×

सुन चाँदी

×

युनिकोड

×